Telugu Food Recipes | Delicious Food Recipes

వీకెండ్ రాగానే ప్రతిఒక్కరు తమ ఇండ్లలో ప్రత్యేక వంటకాలు చేసుకోవడం సహజం. కానీ ఆ వంటకాలకంటే ఇంకా ప్రత్యేకంగా వుండే వాటిని తయారుచేసుకుంటే.. వీకెండ్’ని చాలా బాగా ఎంజాయ్ చేయొచ్చు. వీకెండ్ స్పెషల్ వంటకాల్లో టేస్టీ మటన్ కడై ఎంతో రుచికరంగా వుంటుంది. దీనిని స్పైసీగా గానీ, లైట్’గా కారం వుండేలాగానీ వండుకోవచ్చు. సాధారణ మటన్ కర్రీలకంటే ఈ రిసిపీ చాలా అద్భుతంగా వుంటుంది. ఎంతో స్పైసీగా, నోరూరించేలా వుండే ఈ మటన్ కర్రీని, చిన్నపిల్లల నుంచి పెద్దలవరకు ఆస్వాదించవచ్చు.

దీనిలో ముందుగానే మటన్’ను మ్యారినేట్ చేసి, అందులో ఇండియన్ మసాలా దినుసులను కలపడం వల్ల చాలా టేస్టీగా అనిపిస్తుంది. ఇది పంజాబ్’లో చాలా ఫేమస్. అక్కడైతే దీనిని రెగ్యులర్ డైట్’లో చేసుకుంటారు. ఎంతో రుచిగా వుండే ఈ వంటకాన్ని బయట కొనుగోలు చేయడం కంటే.. ఇంట్లో తయారుచేసుకోవడమే శ్రేయస్కరం. పైగా దీనిని చేసేందుకు ఎక్కువ సమయం కేటాయించాల్సిన అవసరం లేదు.. శ్రమపడాల్సిన పనిలేదు. సింపుల్’గానే ముగించేయొచ్చు. మరి.. దీనిని ఎలా తయారుచేస్తారో తెలుసుకుందామా...

Prep Time

30 Minutes
Cooking Time

25 Minutes
Servings

5-6

కావాల్సిన పదార్ధాలు

350 గ్రాములు మటన్
2 బిర్యానీ ఆకులు
1/4 కప్ ఉల్లిపాయ పేస్ట్
2 లేదా 3 టొమాటోలు (సన్నగా కట్ చేసుకోవాలి)
1/2 టేబుల్ స్పూన్ అల్లం పేస్ట్
1/2 టేబుల్ స్పూన్ వెల్లుల్లి పేస్ట్
1/2 టేబుల్ స్పూన్ జీలకర్ర
1 టేబుల్ స్పూన్ గరం మసాలా
1 టేబుల్ స్పూన్ పసుపు
1/2 టేబుల్ స్పూన్ ధనియాల పొడి
1 టేబుల్ స్పూన్ కారం
1/4 కప్ పెరుగు
3 టేబుల్ స్పూన్స్ నూనె
రుచికి సరిపడా ఉప్పు
3 పచ్చిమిర్చి

తయారు చేయు విధానం

Step 1
మటన్ ముక్కలను నీటిలో వేసి శుభ్రంగా కడిగేసుకోవాలి. తర్వాత పెరుగు, ఉప్పుతో మ్యారినేట్ చేసి 30 నిముషాలవరకు పక్కన పెట్టుకోవాలి.
Step 2
ఒక పాన్ తీసుకొని అందులో కాస్త నూనె వేసి, వేగించాలి. వేడైన తర్వాత అందులో పచ్చిమిర్చి వేసి ఉడికించాలి. తర్వాత దానిని ఒక ప్లేట్’లోకి తీసుకుని పక్కన వుంచుకోవాలి.
Step 3
అదే పాన్’లోనే కాస్త నూనెను జోడించుకుని వేడి చేయాలి. వేడయ్యాక అందులో మటన్ ముక్కలను వేసి బ్రౌన్ కలర్ వచ్చేంతవరకు ఫ్రై చేయాలి. బాగా ఫ్రై అయిన తర్వాత వాటిని ఒక గిన్నెలో తీసి పక్కన పెట్టుకోవాలి.
Step 4
అదే పాన్’లోనే మరికొద్దిగా నూనె పోసి, అందులో జీలకర్ర వేసి వేగించాలి. అనంతరం ఉల్లిపాయ పేస్ట్ కూడా వేసి కొద్దిసేపటివరకు వేడి చేయాలి. వేడయ్యాక అందులోనే అల్లు వెల్లుల్లి పేస్ట్ కూడా వేసి వేగించాలి. ఆ తర్వాత టొమాటో, ధనియాలపొడి, గరంమసాలా, కారం, పసుపు తదితర పదార్థాలు వేసి.. ఆ మిశ్రమాన్ని బాగా కలియబెడుతూ... మరో 10 నిముషాలవరకు వేగించాలి.
Step 5
అలా బాగా ఫ్రై చేసిన అనంతరం అందులో ఇదివరకే మ్యారినేట్ చేసుకున్న మటన్ ముక్కలను వేసి ఫ్రై చేయాలి. 20 నిముషాల వరకు మీడియం మంట మీదే పెట్టాలి.
Step 6
మటన్ ముక్కలు బాగా ఉడికిన తర్వాత అందులో ముందుగా ఫ్రైచేసి పక్కన పెట్టుకున్న పచ్చిమిర్చి మిశ్రమాన్ని ఫిక్స్ చేయాలి. అంతే.. ఈ విధంగా మటన్ కడై రిసిపీని తయారుచేసుకుని, సర్వ్ చేసుకోవచ్చు.