Telugu Food Recipes | Delicious Food Recipes

ప్రతిరోజూ ఉదయాన్నే రకరకాల వంటకాలను తినాలని అందరూ కోరుకుంటారు. కానీ ప్రస్తుతరోజుల్లో మాత్రం ఆఫీసు కార్యకలాపాల వల్ల అసలు బ్రేక్’ఫాస్ట్ చేయడమే మర్చిపోతున్నారు. కానీ.. అలా చేయడం చాలా పెద్దతప్పు. అనారోగ్యబారిన పడాల్సి వస్తుంది. కాబట్టి.. వీలైనంతవరకు ప్రతిరోజూ ఉదయాన్నే బ్రేక్’ఫాస్ట్ చేయడం చాలా మంచిది.

అలా అని ఏదిపడితే అది తినేయకూడదు. ఉదయం లేచిన వెంటనే శరీరాన్ని కాస్త ఉత్తేజపర్చాలంటే ఎక్సర్’సైజ్’తోబాటు ఆరోగ్యకరమైన ఆహారాన్ని తీసుకోవాల్సి వస్తుంది. అప్పుడే ఇతర కార్యక్రమాలను తేలికగా ముగించేడానికి వీలుగా వుంటుంది. మానవ శరీరానికి పోషకాలు అందించే ఆహారాలేంటో తెలుసుకుని బ్రేక్’ఫాస్ట్ చేయడం శ్రేయస్కరం.

అటువంటి ఆరోగ్యకరమై ఆహారాల్లో కిడ్నీబీన్స్ (రాజ్మా) పులావ్ ఒకటి! రాజ్మాలో రెండు రకాలుంటాయి. ఒకటి తెల్లగా వుంటే, మరొకటి బ్రౌన్ కలర్’లో వుంటాయి. బ్రౌన్ కలర్’లో వుండేవాటిని ఎక్కువ రిసిపీలలో ఉపయోగిస్తారు. వీటి ద్వారా బ్రేక్’ఫాస్ట్’లో పులావ్ చేసుకుంటే.. రోజంతా హెల్తీగా వుంటూ, అన్ని కార్యక్రమాలను పూర్తి చేసుకోవచ్చు.

Prep Time

30 Minutes
Cooking Time

20 Minutes
Servings

2-4

కావాల్సిన పదార్ధాలు

1 కప్ కిడ్నీ బీన్స్ (రాజ్మా)
2 - 3 గ్లాసులు బియ్యం
2 - 4 టమాటోలు (సన్నగా తరిగి పెట్టుకోవాలి)
1 టేబుల్ స్పూన్ అల్లంవెల్లుల్లి పేస్ట్
2 -3 ఉల్లిపాయలు (సన్నగా తరిగి పెట్టుకోవాలి)
6 - 8 పచ్చిమిర్చి (సన్నగా కట్ చేసుకోవాలి)
1 టేబుల్ స్పూన్ ధనియాల పొడి
1 టేబుల్ స్పూన్ కారం
1/2 టేబుల్ స్పూన్ పసుపు
1 టేబుల్ స్పూన్ గరంమసాలా
4 -6 టేబుల్ స్పూన్స్ నెయ్యి
ఒక కట్ట పుదీనా
ఒక కట్ట కొత్తిమీర
రుచికి తగినంత ఉప్పు

తయారు చేయు విధానం

Step 1
కిడ్నీ బీన్స్ (రాజ్మా గింజలు)లను నీటిలో బాగా కడిగిన తర్వాత దాదాపు ఐదారు గంటలవరకు నానబెట్టుకోవాలి. (నిద్రపోయేముందు నానబెడితే మంచిది)
Step 2
అలా నానబెట్టిన తర్వాత నీటిని పడేసి, శుభ్రంగా కడిగిన అనంతరం వాటిని కుక్కర్’లో వేసి, కాస్త ఉప్పు వేసి వేడి చేసుకోవాలి. ఇది ఇలా ఉడుకుతుండగానే మరోవైపు బియ్యాన్ని కడిగి, పక్కన పెట్టుకోవాలి.
Step 3
స్టౌవ్ ఒక పాన్ తీసుకుని అందులో కాస్త నెయ్యి వేసి వేడి చేయాలి. వేడయ్యాక అందులో గరంమసాలా, ఉల్లిపాయ ముక్కలు వేసి దోరగా వేయించాలి. అనంతరం అల్లువెల్లిల్లి పేస్ట్, పచ్చిమిర్చి, కారం, పసుపు, ధనియాలపొడి, పుదీనా తదితర పదార్థాలు వేసి కొద్దిసేపటివరకు ఫ్రై చేసుకోవాలి.
Step 4
ఫ్రై అయిన తర్వాత అందులో టమోటా ముక్కలు, ఇదివరకు ఉడికించిన రాజ్మా వేసి బాగా కలియబెట్టాలి. మరో 10 నిముషాల వరకు వేడి చేయాలి. దీంతో రాజ్మా కూర తయారవుతుంది.
Step 5
ఇప్పుడు పులావ్ విషయానికొస్తే.. ఒక పాత్ర తీసుకొని అందులో ఐదుగ్లాసుల నీళ్లు పోసి మరిగించుకోవాలి. పొంగుతున్న సమయంలో అందులో నానబెట్టుకున్న బియ్యాన్ని వేసి, తగినంత ఉప్పు వేసి కాసేపు మూతపెట్టి వేడి చేయాలి. మూడొంతులు ఉడికిన తర్వాత అన్నాన్ని దించేయాలి.
Step 6
ఒక గిన్నెలో సగం అన్నాన్ని పొరలా వేసి వుంచాలి. దానిమీద ఇదివరకు చేసుకున్న రాజ్మా కూరను వేయాలి. అనంతరం మళ్లీ మిగిలిన అన్నాన్ని వేసి.. కాసేపు స్టౌవ్ మీద ఉడికించుకోవాలి. ఉడికిన తర్వాత పులావ్’ను కిందకు దించేయాలి. చివరగా కొత్తిమీరతో గార్నిష్ చేసుకోవాలి. అంతే! రాజ్మా పులావ్ రెడీ!