Telugu Food Recipes | Delicious Food Recipes

దేశంలో ఇడ్లీ-దోసెకు ఒక ప్రత్యేక ప్రాముఖ్యత వుంది. ఉదయాన్నే తీసుకునే బ్రేక్’ఫాస్ట్’లలో అన్ని ఆహారాలు ఒక ఎత్తయితే.. ఈ ఇడ్లీ-దోసెలు మాత్రం మరో ఎత్తు! ఇవి తినడానికి ఎంతో రుచికరంగా వుంటాయి, ఆరోగ్యాన్ని మెరుగుపరుస్తాయి. ప్రతిఒక్కరు ఈ రెండింటిని ఎంతో ఇష్టంగా తింటారు.

ఇక్కడ ఇడ్లీ విషయం కాస్త పక్కనపెడితే.. దోసెకు మరీ విపరీతంగా ఫాలోయింగ్ వుంది. ఈ దోసెను రకరకాల పద్ధతుల్లో తయారుచేయొచ్చు. బయట మార్కెట్లలోని ఫుడ్ సెంటర్లలో వివిధ వెరైటీల దోసెలను రోజూ చూస్తూనే వుంటాం. అందులో ఒక్కొక్కదానికి ఒక్కొక్క ప్రాధాన్యత వుంటుంది.

ఇకపోతే ఈ దోసెల వెరైటీల్లో చాలామందికి బ్రౌన్ రైస్ దోసె గురించి అంతగా తెలిసివుండకపోవచ్చు. నిజానికి అన్నీ దోసెలు చూడ్డానికి ఒకేరకంగా కనిపించినా.. టేస్టులు మాత్రం వెరైటీగానే వుంటాయి. అందులో ఈ బ్రౌన్ రైస్ దోసె ఎంతో రుచిగా, శుచిగా వుండటంతోబాటు రోజంతా ఆరోగ్యంగా వుండేలా చేస్తుంది.

ఎర్రబియ్యంతో తయారయ్యే ఈ దోసెలు.. ఉదయాన్నే తింటే రాత్రివరకు కడుపు నింపుగా వుండేలా చేస్తుంది. అలాగే అన్నీ కార్యక్రమాల్లోనూ చురుకుగా పాల్గొనవచ్చు కూడా! మరి ఇంతటి పౌష్టికరమైన ఈ దోసెను ఎలా తయారుచేస్తారో తెలుసుకుందాం..

Prep Time

20 Minutes
Cooking Time

10 Minutes
Servings

1-2

కావాల్సిన పదార్ధాలు

3 - 4 కప్స్ బ్రౌన్ రైస్ (ఎర్రబియ్యం)
1 కప్ ఉద్దిపప్పు
1 కప్ అటుకులు
1/2 కప్ కందిపప్పు
1/2 కప్ శెనగపప్పు
1/2 కప్ పెసరపప్పు
1 టీ స్పూన్ మెంతులు
రుచికి తగినంత ఉప్పు
కొద్దిగా నూనె

తయారు చేయు విధానం

Step 1
ముందుగా తీసుకున్న బ్రౌన్ రైస్ (ఎర్రబియ్యం), ఉద్దిపప్పు, శెనగపప్పు, పెసరపప్పు, కందిపప్పు తదితర పదార్థాలను నీటిలో శుభ్రంగా కడుక్కోవాలి. అనంతరం వాటన్నింటిని ఒక పాత్రలో మిశ్రమం చేసి.. తగినంత నీళ్లు పోసి రాత్రంతా నానబెట్టుకోవాలి.
Step 2
ఇక ఉదయాన్నే అటుకులను ఒక గంటపాటు నీటిలో నానబెట్టాలి. అనంతరం ఈ అటుకులతోబాటు రాత్రంతా నానబెట్టుకున్న బ్రౌన్ రైస్ మిశ్రమం, పప్పు అన్ని ఒక మిక్సీ జార్’లో వేసి మెత్తగా పేస్ట్ చేసుకోవాలి. బాగా గ్రైండ్ చేసిన తర్వాత కొద్దిగా ఉప్పు వేసి మరోసారి మిక్స్ చేయాలి. తర్వాత అందులో కొద్దిగా నీళ్లు పోసి, దోసెపిండిలా కలుపుకుని, గది ఉష్ణోగ్రతలో 10 గంటలపాటు అలాగే వదిలేయాలి. (ఇలా చేస్తే పిండి పులుస్తుంది. అప్పుడు దోసె వేస్తే టేస్టీగా, క్రిస్పీగా వస్తుంది)
Step 3
అలా 10 గంటలపాటు వుంచిన తర్వాత స్టౌవ్ మీద తవా పెట్టి దానిపై నూనె బాగా రాయాలి. అనంతరం గరిటతో పిండిని తీసుకుని తవా మీద వేసి గుండ్రంగా దోసెలాగా వేయాలి. అప్పుడు మంటను మీడియంలో పెట్టి.. దోసెకు రెండువైపులా బ్రౌన్ కలర్’లోకి వచ్చేంతవరకు కాల్చుకోవాలి. అంతే.. బ్రౌన్ రైస్ దోసె రెడీ!